நினைவுகள் முடிவதில்லை

இன்பத்தில் மூழ்கி இளமையைத் தொலைத்து

இனித்ததும் சில காலம் - பின்

துன்பத்தில் ஆழ்ந்து தொலைத்ததை எண்ணித்

துடித்ததும் சில காலம்……

நன்மையைத் தீமையைப் பிரித்தறியாமல்

நடந்ததும் சில காலம்-அதன்

பின்னணியில் ஓர் மடமையை உணர்ந்து

பிழைத்ததும் சில காலம்…

விரும்பியதெல்லாம் வெற்றிகள் ஆகிட

விளைந்ததும் சில காலம்-அவை

அரும்பிய கனவெனத் தெளிந்தபின் மனது

அவிந்ததும் சிலகாலம்!

அழகிய நட்புகள் பழகிய விதத்தில்

அலைந்ததும் சில காலம்-அது

அழுகிடும் பொருளாய் ஆன பின்னாலே

அழுததும் சில காலம்

கரும்பினித்ததுபோல் கவிதைகள் சுவைத்துக்

கனிந்ததும் சில காலம்-ஒரு

இரும்பும் துருவாய் ஆவதைப் பார்த்து

இளைத்ததும் சில காலம்!

செழுமனம் படைத்த சத்குரு நிழலில்

சேர்ந்ததும் சில காலம்-பயன்

முழுதென வரும்முன் ஊழ்வினை தடுத்து

முறித்ததும் சில காலம்!

இழிநிலை கொண்டோர் உறவினில் இரங்கி

இணைந்ததும் சில காலம்-வீண்

பழிகளில் சூழ்ந்து வழிதெரியாமல்

பதைத்ததும் சில காலம்!

நிரம்பிய அறத்தில் இருப்பதை இரைத்து

நிமிர்ந்ததும் சில காலம்-புகழ்

வரம்பினில் வாழ்க்கைச் சுமைகளை ஏற்று

வளைந்ததும் சில காலம்!

தாய்போல் பேயரைத் தாங்கித் திரிந்து

தாழ்ந்ததும் சில காலம்-தினம்

ஓய்வில்லாமல் உழைத்துடல் இளைத்து

ஓய்ந்ததும் சில காலம்!

கருமே கங்கள் கலைவது போல்துயர்

கலைந்ததும் சில காலம்-அட!

நிரந்தரம் என்று நம்பிய உறவும்

நிலைத்ததும் சில காலம்

நிகழ்வதும் மறைவதும் சிருஷ்டியின் நிஜமாய்

நிலைப்பதும் நிகழ்காலம்-இதை

அகழ்ந்து ணராமல் சுகங்களைத் தேடி

அலைவதும் அலங் கோலம்!

சென்றவை யாவும் செலவினம் ஆக்கி

சிந்தையைச் செதுக்கு கின்றேன் - அதில்

நின்றவை நினைவின் நிஜமென வடித்து

நிம்மதி ஒதுக்கு கின்றேன்!

இன்றதில் வென்றேன்;நேற்றதில் தோற்றேன்;

இரண்டும் எனதில்லை-நான்

நின்றதை எண்ணி எழுதுகின்றேன்;பல

நினைவுகள்....முடிவதில்லை….